Etički odbor Predstavničkog doma Konresa SAD objavio je izvještaj u kojem se navodi da je prikupljen veliki broj dokaza da je konkresmen Džordž Santos kršio zakone. Izvještaj je nakon višemjesečne istrage proslijeđen Sekretarijatu za pravdu SAD, uz zaključak da se republikancu iz Njujorka ne može vjerovati.
Između ostalog, Odbor je naveo da je Santos svjesno natjerao svoj izborni odbor da podnese lažne ili nepotpune izvještaje Federalnoj izbornoj komisiji; da je sredstva za kampanju koristio u privatne svrhe; te da je kršio Zakon o etici u Vladi koji se odnosi na finansijske izvještaje podnesene Predstavničkom domu.
Santos je ostao pri stavu da nije učinio ništa pogrešno i odbio je da podnese ostavku uprkos pozivima mnogih njegovih kolega da to učini. U četvrtak je međutim poručio da se neće ponovo kandidovati na izborima naredne godine.
Izvještaj detaljno opisuje i Santosov nedostatak saradnje tokom istrage, uključujući i izbjegavanje direktnih zahtjeva za informacijama. Informacije koje jeste dostavio, naveo je Odbor, "sadržavale su materijalne pogrešne izjave koje su dodatno unaprijedile neistine koje je iznio tokom svoje kampanje 2022. godine".
U izvještaju se navodi da je istražni pododbor odlučio da odustane od podizanja formalnih optužbi jer bi to rezultiralo "dugotrajnim javnim pretresom i saslušanjem o sankcijama" što bi Santosu samo dalo "dodatnu priliku da odgodi bilo kakvu odgovornost".
Umjesto toga, Odbor je odlučio da kompletan izvještaj pošalje Predstavničkom domu. U njemu poziva članove Doma da "preduzmu sve radnje koje smatraju prikladnim i potrebnim" na osnovu izvještaja.
Otkrića Odbora možda predstavljaju najmanju od Santosovih briga. Kongresmen se suočava sa federalnom optužnicom od 23 tačke u kojoj se navodi da je ukrao identitete donatora kampanje, a zatim koristio njihove kreditne kartice da napravi desetine hiljada dolara neovlašćenih naplata. Federalni tužioci kažu da je Santos, koji se izjasnio da nije kriv, prebacio dio novca na svoj lični bankovni račun, dok je ostatak iskoristio za punjenje kase svoje kampanje.
Santos je takođe je optužen da je Federalnoj izbornoj komisiji lažno prijavio da je svojoj kampanji pozajmio 500.000 dolara, a zapravo joj nije ništa dao, već je imao manje od 8.000 dolara u banci. Lažni zajam je bio pokušaj da se zvaničnici Republikanske stranke uvjere da je on ozbiljan kandidat, vrijedan njihove finansijske podrške, navodi se u optužnici.
Santos je lako preživio glasanje za njegovo izbacivanje iz Predstavničkog doma, ranije ovog mjeseca, jer su većina republikanaca i 31 demokrata glasali protiv toga dok su u toku njegovo krivično suđenje i istraga etičkog odbora.
